ضیوف الرحمن کے لیے سعودی ایئرپورٹس پر الیکٹرانک گیٹس کی سہولت

سعودی عرب کی جنرل ڈائریکٹوریٹ آف پاسپورٹس نے اعلان کیا ہے کہ مملکت کے متعدد بین الاقوامی ہوائی اڈوں پر الیکٹرانک گیٹس کی سہولت فراہم کر دی گئی ہے، جس کا مقصد ضیوف الرحمن کے سفر کے مراحل کو آسان اور تیز بنانا اور انہیں خودکار طریقے سے سفری کارروائیاں مکمل کرنے کے قابل بنانا ہے۔

محکمہ پاسپورٹ نے اپنے سرکاری ایکس اکاؤنٹ پر بتایا کہ اس سہولت سے فائدہ اٹھانے کے لیے سب سے پہلے الیکٹرانک گیٹ پر سفری دستاویز کو اسکین کرنا ہوگا، اس کے بعد بائیومیٹرک تصدیق کے لیے کیمرے کے سامنے کھڑا ہونا ضروری ہے۔

اعرض التغريدة على منصة X

محکمہ نے ہدایت کی ہے کہ الیکٹرانک گیٹس استعمال کرتے وقت کامیاب بائیومیٹرک تصدیق اور آسان کارروائی کے لیے ٹوپی، عینک اور ماسک اتارنا ضروری ہے۔

محکمہ پاسپورٹ کے مطابق یہ سہولت مسافروں کو تیز تر اور آسان سفری تجربہ فراہم کرتی ہے، جس سے بین الاقوامی ہوائی اڈوں پر آمد و رفت مزید سہل ہو جائے گی۔