ٹیکس چوری کی اطلاع دینے کے تین طریقے— زکاة و جمارک کی وضاحت

سعودی عرب میں زکاة، ٹیکس اور کسٹمز اتھارٹی نے ٹیکس چوری کے مفہوم اور اس کی اطلاع دینے کے طریقہ کار کی وضاحت کی ہے۔ یہ وضاحت اتھارٹی کے سرکاری اکاؤنٹ 'اسأل الزكاة والضريبة والجمارك' پر ایک شہری کے سوال کے جواب میں دی گئی۔

سوال کرنے والے شہری نے بتایا کہ وہ تجارتی پردہ پوشی کے شبہے کی اطلاع دینا چاہتے ہیں، کیونکہ ایک شخص نے اپنے اکاؤنٹ پر کھلے عام اعتراف کیا ہے کہ وہ 'متستر' ہے، اس کے پاس 11 دکانیں ہیں اور اس کی ماہانہ آمدنی 16,500 سعودی ریال ہے۔ شہری نے متعلقہ حکام سے درخواست کی کہ وہ ان معلومات، لائسنس، ملکیت اور کاروباری سرگرمی کی تصدیق کریں۔

ایکس پر اصل پوسٹ دیکھیں

اتھارٹی نے وضاحت کی کہ ٹیکس چوری سے مراد وہ عمل ہے جس میں کوئی شخص غلط، جعلی یا من گھڑت دستاویزات، گوشوارے، ریکارڈز یا معلومات فراہم کرے، تاکہ واجب الادا ٹیکس سے بچا جا سکے۔

اتھارٹی نے مزید بتایا کہ اگر ویلیو ایڈڈ ٹیکس سے متعلق کسی قسم کی چوری کا شبہ ہو اور اطلاع دینا مقصود ہو تو شہری اپنی سہولت کے مطابق رابطے کا وقت منتخب کر سکتے ہیں۔ اس کے علاوہ، اتھارٹی کی ویب سائٹ یا ZATCA ایپ کے ذریعے بھی اطلاع دی جا سکتی ہے، اور واقعے سے متعلق دستاویزات یا شواہد منسلک کیے جا سکتے ہیں۔

اتھارٹی نے اس بات پر زور دیا کہ اطلاع دیتے وقت دستیاب دستاویزات یا معاون معلومات فراہم کرنا ضروری ہے، تاکہ متعلقہ حکام شکایت کی تصدیق کر کے رائج قوانین کے مطابق کارروائی کر سکیں۔